热刺前锋哈利卡尼去留问题仍然拉锯，不过拜仁慕尼黑会长汉尼斯率先出招，日前接受德国《踢球者》访问，证实哈利卡尼已向佢哋表明加盟决心，汉尼斯更信心十足表示：「只要哈利卡尼坚持，热刺冇得唔放弃。」

向来「有嗰句讲嗰句」嘅汉尼斯，向《踢球者》大爆拜仁喺收购哈利卡尼嘅立场：「到依家为止，哈利卡尼喺每一次会谈都好清楚表明佢嘅决心，佢想踢欧联，热刺冇份，而拜仁就有得踢。如果哈利卡尼立场坚定，我哋最终会成功，热刺将会放弃，我哋要利维(热刺主席)开价。」

拜仁上星期开出7,000万镑(约7.1亿港元)转会费收购，但被热刺即时拒绝，据报热刺要求至少1亿镑(约10.2亿港元)转会费先肯放人，不过哈利卡尼同热刺嘅合约只剩唔够1年，如果哈利卡尼唔续约，下年就会以自由身离队。