卢卡古突然「变节」私会祖云达斯之後，令国际米兰管理层震怒，决定取消向车路士买断呢位30岁比利时国脚，并计划收购阿仙奴嘅22岁射手巴洛根取代佢。

国米原本已经同车路士倾掂数，将以3,500万欧元(约3.07亿港元)固定转会费及500万欧元(约4,400万港元)浮动转会费买断卢卡古，但会方却一直联络唔到呢位前锋，并传出佢已经同祖云达斯倾紧加盟事宜。

消息曝光之後，《天空体育》指卢卡古曾经致电国米总监奥斯里奥，对方非常不满卢卡古出尔反尔，通话仅30秒就收线，表明唔会签佢。

至於卢卡古能否加盟祖云达斯，其实存在变数，因为祖记声称必须出售前锋杜辛华荷域之後，先至有钱向车路士收购卢卡古。据悉巴黎圣日耳门计划签入杜辛华荷域，但一日未成事，卢卡古都有可能转会「挞Q」，车路士日前要求佢周一(17日)归队操练。

国际米兰临时放弃签卢卡古後，开始物色新前锋，目标包括巴洛根，呢位早前「转会」改为表美国国家队嘅前锋，上季被阿仙奴外借去法甲球队兰斯，表现一鸣惊人，踢37场联赛入21球，已经吸引多间大球会注意，兵工厂亦有意出售佢，弥补收购夏维斯、祖利安添巴、迪格兰赖斯嘅支出，阿仙奴将巴洛根标价为5,000万镑(约5.1亿港元)。