上季成绩令人失望嘅车路士，新一季喺普捷天奴执教下力图重振雄风，不过开操冇耐又有麻烦出现，上季饱受伤患困扰嘅列斯占士，日前操练期间再次觉得膝头痛楚，车路士已安排佢去进行扫瞄检查，希望冇事可以随队出发美国之旅。

23岁嘅列斯占士系车路士重心球员之一，不过近年伤患不断，上季只系踢过16场英超，喺英格兰出战世盃前亦受伤退队，原本谂住新球季要重新出发，但据英国《标准晚报》报道，列斯占士日前练习期间膝头出现痛楚，车路士即刻安排佢去做检查，初步估计问题唔会太严重，希望佢可以随队去美国集训。

车路士目前仍然为阵容进行调整，其中防线已有2名新面孔加入，包括上季外借白礼顿嘅中坚高维尔，以及1月份已签入嘅法国右闸文路古士图正式归队。车路士今个星期展开美国集训，期间会踢4场热身赛，包括喺英超夏日系列斯对白礼顿、纽卡素同富咸。