法甲球会马赛周六(22日)官方宣布，加蓬前锋奥巴美扬正式由车路士加盟，双方签约3年；马赛迎嚟星级前锋，同时亦宣布中场皮耶离队，呢位36岁老将喺记者会入面宣布约满离队，期间更忍唔住痛哭，但佢强调未有挂靴打算，会再物色新球会落班。

马赛希望物色新前锋，成功获奥巴美扬答应加盟，呢位34岁射手相隔10年再战法甲，亦系佢近2季效力嘅第4间球会，今次佢同马赛签约3年，希望可以喺稳定环境下重现德甲、英超神射手本色。奥巴美扬加盟後已即刻随队进行操练。

有新人加盟亦有旧人离开，两度加盟马赛共踢过8年嘅中场皮耶，喺记者会宣布约满离队，佢喊住咁表示：「喺球队复操前，我同会长有一次真诚对话，虽然结果好难消化，亦唔系我预期嘅事，但我好感激会长嘅诚实，佢哋话如果我挂靴，球会可以即时提供培训，但系我仍然想继续比赛。当我决定退休嗰日，我会再返马赛。」