上季英超护级成功嘅狼队，新球季面临更大难关，西班牙籍领队卢比迪古日前公开炮轰管理层，直指自己未有资格参与买卖工作，亦唔知道球会嘅转会政策，直指狼队卖走多位主力，前景不明。

狼队今夏已卖走鲁尔占美尼斯、鲁宾尼维斯、弥敦哥连斯同高亚迪4位主力，摩天奴、迪亚高哥斯达同艾达马查奥尔亦自由身离队，但主要增兵只有马特杜靴迪免费回巢。卢比迪古表示：「我唔知球会有咩转会计划，我都想有答案。事实系狼队需要更多球员，呢一点喺上季尾已经知道。」

据报狼队受到财政公平条例所限，转会资金极少，但卢比迪古就炮轰狼队：「我有清晰目标同计划，财政问题喺我加盟前已经存在，但我唔系财务顾问，我嘅责任系建立一支有竞争力球队，财政公平唔关我事，狼队已经失去好多球员，我哋要搵人代替。」