阿积士翼锋古达斯近期成为抢手货，车路士同阿仙奴据报都想签呢位加纳新星，预计转会费高达4,000万镑(约4亿港元)，不过阿积士总监米斯连达日前表示，如果买家继续「拖字诀」，古达斯嘅转会费将每日提升，意思叫人「有买趁手」！

现年22岁嘅古达斯近2季火速上位，上年世盃决赛周更有2个入球，据报车路士同阿仙奴都有意将佢收购。阿积士总监嘅米斯连达曾经做过阿仙奴总监，上个月亦成功卖祖利安添巴去阿仙奴，不过今次古达斯转会似乎就冇人情出卖。

外号「钻石眼」嘅米斯连达表示：「最好当然系古达斯留队，但佢同时亦有机会转会，球会同球员要保持良好关系，最佳做法就系提高透明度。我会话愈接近转会窗关闭，古达斯嘅转会费就会每日提升。」阿积士希望尽早有定案，令球会有时间物色代替人选，而转会仲关系到另一球星艾臣奥马艾华利斯去留，阿积士希望留用至少其中1人。