曼联今夏已经踢咗6场热身赛，但前锋安东尼马迪尔一直因伤缺阵，1分钟都冇踢过，呢位27岁法国国脚近日已恢复正常操练，并坚持留队，无惧同即将加盟嘅丹麦射手贺兰特争正选位置。

安东尼马迪尔近年经常受伤，睇波多过踢波，单计上季已经7次受伤，合共缺阵32场比赛，一直盛传曼联打算出售佢。不过，马迪尔周薪高达25万镑(约250万港元)，佢唔肯减薪，根本冇球会愿意签入佢。虽然曾经有2支沙特阿拉伯球队邀请马迪尔加盟，但佢已经拒绝，明显下定决定留效曼联。

一般相信曼联签入贺兰特之後，会以呢位20岁新星出任正选前锋，马迪尔留队只能屈居後备。不过，网民认为後备角色非常适合马迪尔，因为根据过去经验，就算冇人同佢争正选，佢每季上阵时间都唔会多。