西甲冠军巴塞隆拿近年一直备受财困问题影响，会方计划今夏出售部份表现未如理想嘅球员，腾出薪酬空间为新兵注册，翼锋费伦托利斯成为清洗目标，会方愿意以4,000万欧元(约3.4亿港元)出售呢位23岁西班牙国脚，阿士东维拉、纽卡素有意接货。

巴塞隆拿2021年12月底以5,500万欧元(约4.7亿港元)向曼城收购费伦托利斯，但不获重用，其中上季西甲虽然上阵33次，但只有14次担任正选，射入4球及2次助攻。巴塞方面唔想留住1位「贵价後备」，希望将佢出售套现，令球会有资金周转，所以甚至不惜去蚀本价4,000万欧元大平卖。

不过，只有少数来自英超嘅球会有兴趣签入费伦托利斯，包括阿士东维拉、纽卡素，但并未正式出手，似乎认为巴塞有机会再减价。

费伦托利斯喺早前热身赛大踢争气波，包括对阿仙奴、皇马、热刺都取得入球，或者有助巴塞「出货」。