衞冕西甲嘅巴塞隆拿新球季出师不利，周一(14日)凌晨开咧战作客被基达菲闷和0比0。呢场比赛踢到充满火药味，全场合共有3张红牌同10张黄牌，巴塞教练沙维同翼锋拉芬夏比洛尼都被逐，球证嘅判决令巴塞非常不满。

巴塞今场进攻质素麻麻，双方埋牙亦出现唔少犯规，42分钟巴塞翼锋拉芬夏比洛尼被指喺跑动中开肘，被球证直接出示红牌；57分钟基达菲亦打少个，谢美马达2黄1红被逐，10打10之下巴塞攻势开始入肉，但逃唔过主场硬朗防守，沙维喺70分钟再因投诉过激被逐，成为今场第3个「红牌阿姑」。

今场补时长达17分钟，完场前再有争议判决，巴塞嘅朗奴阿拿奥祖禁区内被踢跌，但VAR检查後指犯规发生前，巴塞中场加维先犯手球，最终冇判罚12码，赛事0比0结束。沙维赛後炮轰球证：「如果呢场代表西甲，我明点解西甲开始冇人睇，今场波被球证一手摧毁。」