曼城正式宣布同18岁新星列高路易斯续约至2028年，并大幅加人工，由原本5,000镑周薪，大幅提升至25,000镑(约25万港元)，踢好波果然有好报。

列高路易斯8岁已经加入曼城青训系统，上年8月对般尼茅夫，首次喺英超上阵，表现愈来愈好，唔止胜任左右二闸，甚至可以踢防守中场，深得领队哥迪奥拿器重，上季各项赛事上阵23场入1球，代表作一定系欧联分组赛主场对西维尔，佢正选上阵射入1球，协助「蓝月亮」反胜3比1，并以17岁零346日成为欧联史上最年轻入波嘅正选球员，获得加薪续约非常合理。

列高路易斯续约之後话：「真系难以置信获得续约，我自细已经系曼城球迷，要为球队付出一切，取得成功。」列高路易斯被视为基尔获加嘅接班人，上季已经令呢位老将正选位置受动摇，今季有望获得更多上阵时间。