曼联新「传奇7号」美臣蒙特成「魔」後，首次出战英超，表现令人失望，录得0射门0过人差劣数据，最令呢位英格兰国脚尴尬嘅系基斯甸艾历臣入替佢之後冇耐，曼联就入波打开纪录，难怪唔少球迷同网民都呼吁领队坦哈格应该用番艾历臣踢正选。

美臣蒙特今夏以6,000万镑(约6亿港元)转会费由车路士加盟曼联後，一直发挥唔出7号王牌水平，开季前踢咗6场热身赛，冇入波亦冇助攻，今场英超演出一样冇料到，开赛6分钟就因为控球失误，浪费1次攻门黄金机会，其後仍然冇建树，结果去到68分钟被换离场，由基斯甸艾历臣入替，红魔鬼攻势先至开始有起色，仅过8分钟凭华拉尼攻入致胜1球。

坦哈格原本希望用美臣蒙特同般奴费南迪斯组成双核，提升中场组织力，但美臣蒙特似乎仲未清楚自己角色，踢到患得患失，反而削弱中场实力，变成「1+1少於2」。

反观基斯甸艾历臣上季已经证明自己系球队最佳「校炮手」，有佢喺中场调校比赛节奏，令攻势更加畅顺。坦哈格为人为己，都应该用番艾历臣踢正选，至於美臣蒙特可能成为另1位「7号魔咒」嘅牺牲者。