曼联1比0赢狼队嘅英超赛事，补时阶段出现12码争议，球证同VAR对曼联门将奥拿拿撞低沙沙卡拉积锡全无表示，引起极大回响。据报英国职业裁判员公司(PGMOL)赛後已向狼队道歉，而涉事嘅VAR球证梳士巴利早有前科，上季已经出事累PGMOL道歉，估唔到新球季首轮又「濑嘢」。

因投诉而食黄牌嘅狼队领队加利奥尼尔，赛後表示PGMOL官员摩斯已经向佢道歉：「我原本以为球证会去场边睇重播，但原来佢系畀黄牌我。公平啲讲，摩斯完场後已经同我道歉，我明白VAR嘅基本规条系尽量唔干预场上球证嘅判决，但我唔系完全接受。」

今场VAR球证系梳士巴利，佢系上季英超其中一单「经典」误判主角之一，喺白礼顿对热刺嘅大战，球证睇唔到三笘薰禁区内被明显踢跌，而梳士巴利主理嘅VAR未唔帮手，赛後PGMOL亦就错误向白礼顿公开道歉，而梳士巴利亦被停赛处分。