沙特阿拉伯联赛再迎来一位球坛巨星，希拉尔正式宣布签入巴西国脚尼马，据悉双方签约2年，尼马除咗获得1.6亿欧元(约13.7亿港元)天价年薪之外，仲向会方要求一系列「额外福利」，包括提供8部名车、超级豪宅，以至假期消费支出，都要由希拉尔埋单，总之要拥有皇帝式享受，难怪被网民指系史上最贪婪球星。

尼马早前向巴黎圣日耳门(PSG)提出离队要求後，希拉尔立即出手力邀佢加盟，并以1亿欧元(约8.53亿港元)转会费成功说服PSG放人，同尼马倾掂个人待遇条款後，依家正式落实交易。

希拉尔方面喺社交网发放呢位31岁前锋到步及签约过程，并为佢做专访，尼马话：「我想喺呢度书写新故事，沙特联赛有巨大影响力，正在迅速发展，有众多出色球员，所以我相信呢度系理想地方，希拉尔系亚洲最好球队，我喺适当时间，做出最佳选择，我喜欢入波同赢波，来到希拉尔，会继续咁做。」

虽然尼马讲到冠冕堂皇，但其实背後都系钱作怪，因为希拉尔向佢提供1.6亿欧元年薪，仅次於艾纳斯巨星C朗嘅2亿欧元年薪，成为沙特联赛第2高薪球员。不过，1.6亿欧元年薪只系面数，英国《太阳报》指尼马向希拉尔开出一张「福利清单」，包括要求8部名车，其中3部分别为宾利、雅士顿马田、林宝坚尼，总值51万镑(约510万港元)供佢个人使用。另外5部平治房车畀佢嘅家人同朋友使用，并且需要提供司机24小时候命，方便佢哋随时出行。

居住方面，尼马要求入住一座拥有25间房嘅豪宅，令佢可以同家人及朋友一齐住，豪宅内需要有一个40米长及10米阔嘅泳池、3间桑拿室、5位全职工人，仲要提供佢最喜欢嘅果汁品牌。

咁都唔止，尼马仲要求放假出外旅游，乘坐私人飞机、酒店、饮食费用，都要由希拉尔埋单，简直贪得无厌。不过，希拉尔胜在有钱，今夏大洒金钱增兵，相信已经满足晒尼马嘅所有要求，先至吸引到佢加盟。