周日(20日)凌晨西甲，皇家马德里作客以3比1反胜艾美利亚，开季2战2胜，今夏以超过1亿欧元(约8.6亿港元)由多蒙特加盟皇马嘅中场祖迪比寜咸，踢出球王级水准，头顶脚踢入2球，并有1次助攻，成为自2009年C朗之後，第一位登陆西甲首2场都入波嘅皇马球员。

开赛仅3分钟，艾美利亚透过1次反击，迅速打开纪录，但皇马始终整体质素远高於对手，19分钟就由祖迪比寜咸近门射入扳平，换边之後，呢位20岁英格兰国脚接应却奥斯长传，顶入协助「银河舰队」反超前。祖迪比寜咸入2球之後，亦不忘为队友创造机会，传畀云尼斯奥斯祖利亚射成3比1。

主角祖迪比寜咸继首场西甲对毕尔包入波之後，今仗再梅开二度，成为近65年以来，第3位喺登陆西甲首2场入到3球或以上嘅非前锋球员，亦系继C朗之後，近14年第一位首2场踢西甲都有入波嘅皇马球员。

赛後祖迪比寜咸话：「好开心可以入波，最重要系踢场好波，作出贡献，我同队友非常合拍，但仲需要继续努力，我从未谂过输波，就算今场先落後，我哋表现都好淡定，就知道一定会反胜。」另一位入波功臣云尼斯奥斯祖利亚亦有出色表现，佢为皇马上阵227场，已累积入60球。