巴塞隆拿新星安素法迪，自沙维上任执教後未受重用，据西班牙《阿斯报》报道，呢位20岁翼锋已经决定离队，传闻英超3雄曼联、阿仙奴同热刺都对佢好有兴趣，随时准备出手。

拉马西亚出身嘅安素法迪，曾被视为球会未来巨星，巴塞隆拿甚至将美斯件10号战衣交畀佢继承，不过佢自从重伤之後状态下滑，上季亦未获沙维重用，今季西甲开锣战对基达菲，佢入替时间甚至喺另外2位新人艾沙苏利同耶马之後，去到79分钟先至登场。《阿斯报》指安素法迪自知冇碇企，已决定离队寻求新机会。

据报沙维并唔想放走安素法迪，而且佢同巴塞隆拿仲有4年合约，转会费肯定唔低，传闻曼联、阿仙奴同热刺都想签安素法迪，其中热刺卖走哈利卡尼後，急需为前线增兵，或会系最积极收购嘅球队。