英超球会诺定咸森林周四(24日)宣布，成功向西维尔借用阿根廷国脚干沙路蒙迪尔1季，成为森林今夏第5位新兵。干沙路蒙迪尔上季大丰收，帮阿根廷赢世盃之後，再为西维尔捧欧霸盃，无独有偶，2场决赛都系由干沙路蒙迪尔射入致胜12码，被球迷大赞系「大心脏」。

26岁嘅干沙路蒙迪尔将会着起29号波衫，佢喺签约後表示：「我细细个已经睇英超，每一场都睇，作为球员当然想踢最好嘅联赛，而英超就系最佳联赛，我会为森林尽力争取胜利同埋奖盃。」森林喺借用期结束後，有权用约1,000万镑(约1亿港元)将佢买断。

森林今夏已签入基斯活特、艾拿、艾兰加同马特端纳，干沙路蒙迪尔系第5个新球员，佢哋今季开咧目前1胜1负，上仗主场击败锡菲联打开胜利之门。