曼联喺英超作客1比3不敌阿仙奴，赛後再爆出将帅决裂风波！曼联领队坦哈格赛後解释查顿辛祖未有入选今场大名单，系因为操练表现差，查顿辛祖随即发声明反击，公开批评坦哈格讲大话，直指坦哈格唔用佢系「另有内情」，认为自己一直被坦哈格用作代罪羔羊！

曼联作客阿仙奴嘅大军名单，夏天转会窗盛传会离队嘅麦汤米尼同查顿辛祖，齐齐榜上无名，反而用咗小将米积伯利同丹尼尔哥尔，坦哈格赛後解释：「麦汤米尼病咗，而查顿辛祖唔入选系因为佢操练嘅表现。」言下之意系指查顿辛祖练波态度出现问题。

坦哈格嘅访问言论出现後，查顿辛祖随即发出强硬声明反击：「请唔好相信所有你睇到嘅嘢！我唔会容许其他人讲大话，我今个星期操练非常认真，我相信呢件事背後有其他原因，但我唔想讲，我一直以嚟都被当代罪羔羊，实在太唔公平！我唯一希望就系带住微笑踢波、为球队作出贡献，我尊重教练团队所有决定，好感恩可以同一班神奇球员一齐踢波，每个星期都系一大挑战，无论如何，我会继续为曼联而战斗。」

曼联上季高价收购安东尼马菲奥斯後，查顿辛祖嘅上阵机会随即大减，季前热身改踢前锋亦冇乜表现，虽然今季头3场联赛都有份後备入替，但今仗作客阿仙奴就意外落选。