曼联喺作客阿仙奴前，正式公布新兵球衣号码，射手贺兰特将会着格连活特离队之後留低嘅11号，副选门将比恩迪亚获得1号，左後衞利古朗着15号。

至於由短期合约改为签1年长约嘅庄尼伊云斯，就会着35号。庄尼伊云斯之前效力「红魔鬼」时，曾经着过4号、23号同6号，23号现时主人系劳基梳尔，6号系利辛度马天尼斯所有，仲净番4号可以拣，不过有指拣35号，可能同佢35岁仲有回归有关。

另外，门将位置亦大执位，由费伦巴治来投嘅比恩迪亚，获1号球衣，汤希顿就着22号。至於上季着49号嘅加拿祖，今季就改着17号，取代已离队嘅费特。