英格兰中场祖迪比宁咸喺西甲童话式开局延续，周六(2日)联赛靠佢喺补时5分钟嘅「绝杀」，皇家马德里得以主场2比1反胜基达菲，开季4战全胜高踞榜首位置。祖迪比宁咸连续4场联赛入波，成为西甲21世纪第4个喺头4场联赛入波球员。

皇马今场早段先失，後防失误令基达菲嘅马约拿尔先开纪录，不过佢哋企稳阵脚後发起狂攻，换边後2分钟就由祖斯奴近门追成1比1。皇马之後攻势浪接浪，但要去到95分钟先藉基达菲门将扑波甩手，祖迪比宁咸反应快冲前执鸡，射入致胜一球。

20岁嘅祖迪比宁咸今夏由多蒙特转投皇马，开季4场联赛场场入波(共5球)，成为伊巴谦莫域(2009年)、C朗拿度(2009年)同法比加斯(2011年)後，成为今个世纪第4个喺个人头4场西甲都入波球员。皇马教练安察洛堤赛後表示：「比宁咸嘅走位系最大特长，佢非常专注而且稳定，一季入15球以上完全冇问题。」