欧洲主要联赛转会市场关闭，不过沙特阿拉伯球会喺今个月20号前仲可以继续买人，由谢拉特领军嘅伊蒂法克，周日(3日)宣布签入荷兰中场韦拿杜姆，重组佐敦轩达臣+韦拿杜姆嘅昔日「红军中场组合」。

32岁嘅韦拿杜姆2年前由利物浦转投巴黎圣日耳门(PSG)，可惜表现未如理想，上季被外借去罗马亦甚少上阵，PSG早已决定将佢卖走，原本阿积士同燕豪芬都传出对佢有兴趣，但最终谢拉特出手成功带佢去伊蒂法克，签约3年。

韦拿杜姆同佐敦轩达臣喺利物浦合作过5年，一齐赢过欧联同英超冠军，今次喺沙特重逢令球迷勾起无限回忆。伊蒂法克今个夏天除咗签「红军孖宝」之外，仲收购苏格兰守将积亨特利同法国前锋穆沙迪比利。