志切争夺英超冠军嘅阿仙奴，开季冇耐就伤兵频传，加纳足总证实中场汤马士柏迪鼠蹊部受伤，将会缺席今个月嘅国际赛。英国传媒消息指，汤马士柏迪今次受伤严重，可能会缺席3个月赛事。

加纳足总日前为非国盃外围赛点兵，汤马士柏迪冇份入选，足总声明表示：「汤马士柏迪因伤落选，根据球会所讲，汤马士柏迪喺操练受伤要抖一段时间，我哋嘅军医会密切注视。」英国《太阳报》报道，汤马士柏迪鼠蹊部拉伤，休养期或长达3个月。

阿仙奴喺开咧第1场，已经有荷兰後衞祖利安添巴韧带重创，今季好可能提早报销，原本汤马士柏迪都系「客串」右闸嘅人选，点知依家又伤埋，连同早前放走洛贺丁同基兰泰亚尼2名守将，阿仙奴防线人手真系掹掹紧。