今个星期英超重头大战，阿仙奴就喺酋长球场摆下擂台阵硬撼曼联，阿仙奴虽然保持不败，但系球队今届都存在唔少要解决嘅问题，例如球员对领队阿迪达的新战术发挥一般，个别球员状态低沉同埋伤兵问题等等，呢啲问题都唔系一时三刻可以解决。

而曼联就仲惨，中坚华拉尼受伤要抖6个星期。其实上星期我入到卡灵顿训练中心，见到佢练波个膝头紮到实一实，嗰一刻我仲同个同事讲佢都系应该练唔到?啦。点知之後场对森林仲要正选出埋，踢咗半场都系要换走入返更衣室休息。喺卡灵顿见到另一位中坚哈利马古尼，佢一行出球场见到佢笑都唔笑下，好似心事重重咁，随住华拉尼同劳基梳尔受伤，中坚唔够人嘅情况下，主帅坦哈格都系要留番佢，咁到时马古尼就可以笑番啦。

曼联喺死线日借入中场苏夫恩岩拉伯特、左闸利古朗，加上新前锋贺兰特可以随时候命，或者可以为曼联带嚟新景象。