今夏疯狂招兵嘅车路士，周六(2日)英超主场0比1不敌诺定咸森林，开咧4场第2度输波，最惨系2位贵价新兵孭晒镬，摩西斯卡些度再交「自杀式助攻」，前锋尼高拉斯积逊就上演门前3码「炒飞机」，领队普捷天奴赛後都埋怨一攻一守「出晒事」难以接受。

车路士今场形势占优，但48分钟摩西斯卡些度一次由守转攻嘅反击，竟然一控即甩直接送畀对手，森林即由艾兰加半单刀射入。车路士本来都有追平黄金机会，但83分钟史达宁右路突破制造混乱，尼高拉斯积逊门前3码施射竟然高出，注定车路士要输波收场。

车仔领队普捷天奴赛後表示：「我哋後防犯咗一个唔应该犯嘅错，所以我特别失望。足球比赛就系斗少犯错，我哋出错就付出代价。」对於前锋把握力差，普捷天奴同样不满：「我哋制造好多机会，但系入唔到波，呢场系我哋应该赢嘅比赛，但首先要改善把握力，入唔到波就一定赢唔到。」