英超「戴帽日」！白礼顿喺周日(3日)凌晨主场3比1击溃纽卡素，18岁前锋艾云费格逊个人大演帽子戏法，成为英超史上第4个以18岁之龄单场入3粒球员。英超第4轮射手大爆发，连埋周六(2日)晚嘅孙兴民同艾宁夏兰特，一晚有3个球员「戴帽」，系英超28年来首次出现。

两队上轮都输波，今场主队白礼顿决心更大，27分钟连环射门由艾云费格逊先开纪录，呢位爱尔兰「妖人」65分钟远射得手，5分钟後再接应三笘薰传送完成「帽子戏法」，纽卡素补时阶段由哥林威尔逊破蛋。艾云费格逊亦成为科拿、奥云同巴特威廉斯之後，第4个以18岁之龄连中三元嘅英超球员。

白礼顿被公认系「星工厂」，艾云费格逊被睇好成为下一个「1亿镑球员」，领队迪萨比赛後表示：「我戥佢开心，唔单止系入波，而系佢嘅整体表现。艾云费格逊会系顶尖球星，佢嘅能力足以成为欧洲最佳前锋，佢系2004年出世，我唔知有几多个18岁球员可以好似佢咁入波。」

第4轮英超射手轮住爆，热刺前锋孙兴民喺对般尼一仗连中三元，曼城前锋艾宁夏兰特亦喺对富咸一仗「戴帽」，艾云费格逊对纽卡素又入3粒，一晚出现3位「戴帽」球员，对上一次已经系1995年嘅9月，当时科拿、舒利亚同耶保亚分别连中三元。