西班牙老将沙治奥拉莫斯周二(5日)宣布重返西维尔，相隔18年後再为母会效力，不过佢效力皇家马德里期间，曾多次同西维尔球迷交恶，今次回归後第1时间拍片「耍冧」，表明已经同西维尔球迷坐埋「同一条船」，果然识捞。

沙治奥拉莫斯喺2005年转会皇家马德里，当时佢同球会闹翻，西维尔会长指佢系「大话精」。2018年沙治奥拉莫斯倒戈入2球後，走去西维尔球迷面前做挑衅动作，球迷狂掟杂物还击，导致西维尔被罚关闭部份看台，而西维尔亦投诉沙治奥拉莫斯挑衅行为，当时沙治奥拉莫斯曾表示：「部份西维尔球迷唔值得我尊重。」

呢位37岁老将拒绝沙特阿拉伯球会聘约，减薪9成重返西维尔，佢加盟後第1件事就系拍片道歉：「今日系非常特别日子，我终於返屋企。我之前曾经犯错，依家想向因我嘅行为而受到冒犯嘅人道歉，我哋依家坐埋同一条船，我会尽力为球会达成目标。」