英格兰喺欧国外对乌克兰，防线有机会出现新景象，由於史东斯受伤、哈利马古尼喺曼联亦长居後备，领队修夫基正考虑系咪试用新组合，上季白礼顿嘅中坚李维士邓克同高维尔，有望喺英格兰再度合作，而修夫基最要多谢嘅人系白礼顿领队迪萨比！

据英国《每日邮报》报道，马克古希、李维士邓克同高维尔都有机会喺今轮国际赛上阵，其中车路士中坚高维尔嘅冒起，更加系修夫基嘅喜讯，英格兰向来缺少左脚嘅用波型中坚，20岁嘅高维尔就被视为未来支柱。高维尔上季由车路士外借白礼顿，喺意大利名帅迪萨比教导下大为成熟，同李维士邓克合作无间，有望成为英格兰中坚组合。

高维尔表示：「足球战术改变咗好多，我锺意喺後场展开攻势，史东斯就系模范，上季跟迪萨比踢波令我对自己技术更有自信。」贵为白礼顿防线核心，李维士邓克同样将自己嘅进化归功迪萨比：「自从迪萨比上任，我对足球有全新嘅体会，朴达之前已经踢悦目足球，但迪萨比对细节嘅执着系无人能及，我觉得自己依家先真正认识足球。」