曼联翼锋查顿辛祖同领队坦哈格关系破裂，预料呢位23岁英格兰国脚好大机会明年1月转会市场重开後离队，意大利传媒指罗马教练摩连奴密切留意辛祖情况，并有意借用佢。

查顿辛祖早前公开反驳坦哈格指佢训练表现欠佳嘅言论之後，两人反面，坦哈格要求对方道歉，但辛祖拒绝，结果坦哈格使出「封杀令」，唔止雪藏查顿辛祖，甚至禁止佢出现喺训练场内任何一队区域，包括一队嘅饭堂。

查顿辛祖嘅红魔鬼生涯已进入倒数，除咗前度球会多蒙特有意回购佢之外，罗马亦想借用，呢支意甲首都球队今季成绩欠佳，踢5场联赛只有1胜2和2负，计划冬季增兵，教练摩连奴一向对曼联球员情有独锺，希望借用辛祖救亡。一般相信曼联唔会将查顿辛祖出售或者外借去其他英超竞争对手，罗马的确有机会签入佢。