西班牙门将迪基亚今夏以自由身离开曼联後，仍然未有班落，更传出打算收山，其实现时球坛唔止佢一位星级「孤儿仔」，协助阿根廷捧上年世界盃冠军嘅中场艾真度高美斯同样未有球会收留，可能考虑直接挂靴。

现年35岁嘅艾真度高美斯2014至20年效力阿特兰大期间打出名堂，为呢支意甲球队上阵252场入59球，2021年1月转投西维尔。高美斯上年世界盃首轮分组赛以正选上阵，但阿根廷却大热倒灶不敌沙特阿拉伯，呢位身高1米67位「矮脚虎」被主帅史卡朗尼打入冷宫，佢踢完世界盃後，因为伤患问题沦为西维尔後备，结果今夏被提早1年解约。

据悉艾真度高美斯曾经打算去阿联酋搵食，但始终未能获得满意合约，所以唔排除退役，佢话：「我好享受喺塞维利亚(西维尔所在城市)嘅生活，正在等待一个合适机会，如果机会冇出现，我会考虑退休，为咗足球，我已经付出一切，唔想最後晚节不保。」