曼城前锋艾宁夏兰特仲有近4年合约在身，但会方已经急不及待计划同呢位23岁挪威国脚续约多1年，去到2028年，并会喺现有40万镑(约380万港元)周薪及奖金条件之上再加码，实行以银弹战术绑实夏兰特。

艾宁夏兰特上年夏天由多蒙特加盟曼城，上季为「蓝月亮」各项赛事上阵53场，射入52球及9次助攻，成为球队夺得英超、英足盃、欧联及欧超盃嘅功臣。即使曼城今季失去中场根度简，加上奇云迪布尼养伤，但夏兰特11次上阵仍然有8球进帐及2次助攻，加上佢跑动亦牵制对手大部份注意力，会方认为绝对唔可以失去呢位神锋，希望尽快同夏兰特续约多1年。

据悉曼城之所以急於同夏兰特倾续约，除咗因为佢表现出色之外，亦希望趁续约，废除毁约金条款，避免被皇马挖角。夏兰特现时合约包含解约条款，等到2024年夏天，其他球会只要出2亿欧元(约16.5亿港元)就可以买断佢。