AC米兰周日(8日)凌晨作客1比0击败热拿亚，升上意甲榜首，首席射手基奥特再成赢波功臣，不过佢今场并冇入波或助攻，而系客串龙门喺补时献出关键神救！基奥特赛後讲明要裱起呢件历史性嘅龙门衫，而网民亦一致大赞基奥特守龙「劲过奥拿拿」！

AC米兰作客热拿亚战况胶着，战情一直颇为平淡，直到完场前突然高潮迭起，87分钟基斯甸普列斯接应传中射入，为客队领先。补时7分钟AC米兰门将迈治兰出迎，禁区外粗暴撞跌对手被逐，由於AC米兰当时已经用晒换人名额，令基奥特要改着迈治兰波衫客串守龙。

热拿亚之後疯狂进攻，先有艾拔古蒙臣罚球中楣，最後时刻佐治普斯卡斯有半单刀机会，基奥特及时出迎快半步将个波拍走，再喺热拿亚球员赶到补射前，回身将个波擒实。化险为夷後，一众队友即刻走去揽实基奥特庆祝，呢位法国前锋亦振臂高呼，激动过射入绝杀。

37岁嘅基奥特赛後表示：「我从未经历过咁嘅事，我哋奋力战斗，我仲有个精彩扑救！当时我觉得出迎系好过企喺龙门口，我唔识门将嘅移动，只系凭感觉去判断。我会留起呢件迈治兰嘅波衫，裱起佢作为留念。」

AC米兰教练皮奥利透露普列锡曾请缨守龙，但佢认为基奥特嘅身高更加适合；前AC米兰球星蒙杜利禾亦赞扬基奥特嘅表现：「基奥特好识阅读球赛，呢球波好多龙门都唔会选择出迎，佢嘅决定令人惊讶，而且仲冇犯规添，呢3分系基奥特救返嚟。」

基奥特客串门将成为网民热话，唔少球迷都话佢守龙门稳阵过同日又犯错嘅曼联门将奥拿拿：「基奥特可以喺曼联做正选门将」、「呢个先系坦哈格最想要嘅用波型龙门」、「如果系奥拿拿，佢会企喺白界睇住对手射入」。