利物浦今夏豪花6,000万镑(约5.7亿港元)收购RB莱比锡中场苏保斯拉尔，一度令人担心可能买咗「水货」，但呢位23岁匈牙利国脚用行动证明身价，今季英超有6项数据排队内前3位，展现全能战士威力。

苏保斯拉尔身穿昔日「神奇队长」谢拉特8号球衣，果然发挥核心角色，成为今季英超唯一上阵达到900分钟嘅非门将红军球员，并且瞻前顾後，累积632次传球，其中有25次关键传球，2顶数据都系队内最多。

苏保斯拉尔仲有28次盘球，排队内第2位，另外有21次射门及14次铲球同样属於队内第3位，可以话系攻守兼备。

利物浦领队高普对苏保斯拉尔赞不绝口：「佢集力量、技术、欲望於一身，几乎具备所有你想要睇到嘅特质，最不可思议系佢年仅23岁，仲有好大进步空间。」利物浦曾经想收购祖迪比宁咸，但被皇马截胡，事实证明签入苏保斯拉尔，性价比不在祖迪比宁咸之下。