曼联上场1比0险胜富咸抢到救命3分，亦救番坦哈格一命，唔使炒仲有奖攞，呢位红魔主帅周一凌晨(6日)出席英国足球记者协会颁奖晚宴，获颁FWA北方最佳教练奖，讽刺嘅系，如果嚟紧欧联未能击败哥本哈根，随时帅位不保。

呢个奖项其实系表扬坦哈格上季赢得英联盃，不过评选畀奖佢嘅唔少记者，就系依家闹佢教得曳嘅同一班人，事实上坦哈格现时帅位岌岌可危，连续输畀曼城同纽卡素後，佢必须取得3连胜，赢富咸只系第一关，嚟紧仲要击败哥本哈根同卢顿先可续命，其中对哥本哈根呢场非常重要，如果赢唔到就好难出线。

坦帅攞奖後上台致辞，表示坚持自己方向正确：「我为夺冠开启一个新时代感到骄傲，现时我哋处於低谷，足球同人生都有起起落落，最重要系团结埋一齐，我相信我嘅方向正确，喺足球世界，一切都系为咗捧盃，上季我哋开局艰难，结果有个伟大赛季，我哋有更高目标，等紧去实现。」