被视为欧联「死亡之组」嘅F组，周三(8日)凌晨踢完第4轮後形势更紧凑，原本榜尾嘅AC米兰主场2比1反胜巴黎圣日耳门(PSG)，英超劲旅纽卡素就作客吞多蒙特2蛋，依家小组4队只有3分差距，纽卡素下轮作客PSG非胜不可，不过「喜鹊」残阵下再有哥林威尔逊受伤，形势危急。

纽卡素依家伤兵满营，今场只有13个外场球员候命，而且只摆8个後备，当中包括2名门将同几位青年军，结果26分钟被多蒙特中路打穿，富克洛近门射入先开纪录；纽卡素56分钟有黄金机会，但祖连顿飞顶贴柱出界，多蒙特79分钟再由祖利安白兰特快速反击入波，锁定2比0胜局。

纽卡素喺欧联连输2场後，依家4战4分跌落榜尾，下轮作客PSG再输就肯定提前出局。纽卡素领队艾迪侯域赛後表示：「我哋今日唔喺最佳状态，同上个月输畀多蒙特一样，我知道我哋明明可以踢得更好，多蒙特冇遇到真正嘅纽卡素，依家只能够展望未来。」

纽卡素下轮一定唔可以输畀PSG，最後一轮主场对AC米兰或者仲有价讲，不过佢哋目前伤兵众多，前锋哥林威尔逊半场期间换走，艾迪侯域表示：「佢嘅大腿筋出现问题，令球队变动空间更少，依家未知佢伤成点，但球队依家情况紧急。」