今晚英超重头戏，热刺主场斗车路士，系双方齐齐出战连续3周嘅「伦敦打吡」。热刺对上两场「伦敦打吡」都赢波，开季10场联赛8胜2和，反观车仔近两轮联赛仅得1和1负，难敌如日中天嘅热刺，热刺让平半，上盘抵玩！（Now 621及611周二凌晨4时直播）

热刺今晚又嚟深夜波，梗系喇，佢哋唔使踢欧洲赛，赛程编排会多啲当地时间周一晚嘅赛事。换个角度睇，即系热刺今季可专心联赛，难怪球队成绩咁好。热刺由孙兴民担任队长後，表现大熟大勇，上场作客水晶宫又有入波，联赛10战轰入8粒，此外今季两位新兵占士麦迪臣及云迪尹亦有亮丽表现，前者贡献3个入球及5次助攻，系孙兴民嘅最强支援，云迪尹更系英超今季拦截成功率最高球员，可谓攻守兼备。

车仔虽然都唔使踢欧洲赛，可惜佢哋表现太过飘忽，早前经历3连胜後，近两场联赛喺主场踢「伦敦打吡」都失利，先同阿仙奴踢成2比2，再倒灶以0比2不敌宾福特，连续两场失两球，摆明後防有问题，今晚对住热刺嘅全场逼抢，肯定更恶啃，後防难免风声鹤唳。热刺依家同曼城等劲敌链得咁肉紧，3分志在必得，上盘值得支持。