纽卡素喺周日(3日)凌晨英超主场1比0击败曼联，不过亦付出沉重代价，正选门神尼克普比喺比赛尾段飞身救波，落地後怀疑膊头甩骹，领队艾迪侯域赛後直指伤势「睇落好差」，有可能要做手术，令纽卡素伤兵人数增加至12人。

尼克普比今场比较清闲，但82分钟一次飞身尝试救波，落地後即举手示意受伤，要由後备杜巴夫卡代替。艾迪侯域赛後表示：「呢个系今场最失望地方，尼克普比疑似膊头甩骹，情况睇落好差，佢之前都试过甩骹，做完手术後成功克服。我唔知佢今次使唔使做手术，先要问专家嘅意见，尼克普比缺阵对球队会系重大打击。」

纽卡素依家伤兵满营，积及梅菲早前亦喺膊头甩骹做手术，要抖到明年初先可以复出，加上哥林威尔逊、丹般恩、祖尔韦洛克、桑恩朗达夫、保治文等主力受伤，一队伤兵停赛人数增加至12人。