周日(3日)凌晨举行嘅欧国盃抽签全球瞩目，现场亦有大量球星、名宿出席，不过抽签期间就出现超尴尬场面，大衞施华、白赖仁劳特立等嘉宾抽签嗰阵，现场突然传出女性叫床声，德国领队拿高斯文等被影到「偷笑」，事後英国「整蛊专家」Jarvo承认恶作剧由佢策划。

今次抽签仪式星光熠熠，但当大衞施华抽出A组最後一队瑞士嗰阵，现场突然传出女性叫床声，呢位西班牙名将亦尽力「扮冇嘢」，但明显吓窒唔知望去边，之後抽签嘅丹麦名宿白赖仁劳特立就冇咁好「定力」，抽签嗰阵露出忍唔住笑神情，而镜头亦影到德国领队拿高斯文偷笑。

呢个尴尬抽签过程全球直播出街，事後英国「整蛊专家」Jarvo喺社交网拍片，自爆恶作剧由佢策划，佢一早将手机收埋喺抽签会场，等抽签期间致电手机，令佢响起「叫床铃声」。其实同一个恶作剧，Jarvo之前亦喺英格兰名宿连尼加嘅节目上玩过，不过今次连全球盛事都玩，难怪Jarvo表示：「同我哋讲边个先系世界最佳整蛊专家？」