今晚意甲独脚戏，「1哥」国际米兰主场迎战热拿亚。国米踏入2024年赢到开晒巷，唔好话输波，连个和字都唔识写，队长拿达路马天尼斯脚风顺到冇朋友，而且主场出击非常抢缰，半场主胜捧得过。（Now 638周二凌晨3时45分直播）

自从2024年开始，国米就开行Turbo系咁冲，各项赛事连赢11场，包括勇夺意超盃，以及欧联16强首回合击败马体会，单计近4场联赛场场狂轰4粒，其中近3场都系大胜4比0。最重要系主帅施蒙尼恩沙基近几仗不断作出轮换，但完全冇影响球队攻守，反映出无论正选抑或後备球员都弗到漏油，队长拿达路马天尼斯上仗更取得佢喺国米生涯第102球，亦系球队史上第3位达到100球以上里程碑嘅外援，加上积分已经远远抛离祖云达斯，重夺联赛冠军指日可待。

国米11连胜之前，就喺联赛首循环作客今仗嘅对手热拿亚打和1比1，热拿亚喺主帅兼前意大利国脚基拿甸奴带领下，依家站稳中游，但佢哋作客国米多数冇运行，近7次造访国米全败，不宜高估。何况国米近6场联赛主场，全部都喺上半场取得领先优势，今场随时又先发制人，半场主胜有计。