利物浦杀入英联盃决赛！周五(21日)凌晨英联盃4强次回合赛事，利物浦喺穆罕默德沙拿同沙迪奥文尼缺阵下，仲有葡萄牙神锋迪亚高祖达单天保至尊，个人梅开二度作客2比0赢阿仙奴，两回合合计以相同比数晋级决赛，将会喺2月27日同车路士争逐冠军宝座。

两队首回合踢成0比0，利物浦今场作客继续强阵出击，虽然两大前锋穆罕默德沙拿同沙迪奥文尼仲踢紧非国盃，但仍然同阿仙奴踢成均势，早段拿卡锡迪罚球中楣弹出，不过利物浦第1次攻势就有收获，迪亚高祖达左路突破，推至中间快脚妙射收死兰斯达尔。

阿仙奴之後踢得比较主动，但面对利物浦严密防线亦制造唔多太多机会，而且喺77分钟再输反击，迪亚高祖达突破越位後单刀笠入，系佢个人近4次对阿仙奴第4个入球，更重要系带领利物浦纪录性第13度杀入英联盃决赛，堪称系「阿仙奴克星」。

利物浦领队高普赛後大赞迪亚高祖达：「我哋入咗2个精彩入波，迪亚高祖达着晒火！我哋签佢嗰阵已经深信佢会踢得好好，加盟之後更进一步，佢已经成为世界级前锋。」对於决赛对车路士，高普就话要先专注英超：「温布莱系个好特别嘅地方，但决赛前仲有好多比赛，入到决赛当然系想攞冠军，不过对手一样会咁谂。」