英超曼联早前欧联16强两回合计，以1比2不敌马德里体育会提早出局。赛後有球迷因为不满球队表现，喺场外同拉舒福特闹交；事後依名英格兰国脚於社交平台公开道歉，解释自己都系普通人类，今次因一时愚蠢犯下错误，但否认曾向对方举中指。

透过网上流传片段，可以见到一名曼联球迷赛後，喺奥脱福场外同拉舒福特隔空闹交，当中更影到依名24岁前锋疑似向球迷举出中指。事後「福仔」随即喺社交平台发出声明，直指大家所睇到嘅片段并唔完整，自己想喺到澄清两件事：「第一样我无同球迷闹交，只系叫个位辱骂我嘅人，过嚟当住我面讲。其次我无举中指，而系用食指叫佢行过嚟。」

「福仔」续指近日受到唔少批评同质疑下已经筋疲力尽，而自己亦只系一个普通人类，今次犯错因为一时愚蠢，明知当时有好多手机影住，应该要唔理佢哋同直接离开。拉舒福特欧联16强对马体会表现平平无奇，次回合更被贬後备，下半场入替艾兰加後亦未有太大建树，难怪赛後成为球迷攻击对象。