曼联新帅人选即将确定，消息指好大机会系阿积士主帅坦哈格，而且佢唔系两手空空过档，而系带埋两位潜质新星入魔，一个系巴西天才翼锋炙手可热嘅安东尼马菲奥斯(Antony Matheus)，另一位系荷兰中坚添巴(Jurrien Timber)。

英国《镜报》报道，坦哈格向曼联高层嘅主帅面试，双方深入交流，坦哈格甚至问到曼联嘅重建计划，今夏增兵预算同收购意向，已经唔只面试咁简单，一旦双方真正合作，有关计划就会付诸实行。

消息指，坦哈格已经安排好，入主曼联後，就会带同佢两位阿积士爱将加盟，其中22岁嘅安东尼马菲奥斯系巴西新晋国脚，身价估计至少5000万欧元，佢喺阿积士上阵两季，79场入22球，被誉为有机会达到尼马级数，巴西未来进攻王牌。

另一位系20岁中坚添巴，亦系荷兰新晋国脚，效力阿积士3季，近两季成为主力，坦哈格有信心呢两位「自己人」，一次过解决曼联攻防顽疾。