巴黎圣日耳门(PSG)向基利安麦巴比开出最新续约条款，两年合约总计2.3亿欧元(约19.6亿港元)，只求该法国前锋留喺巴黎踢多两季，约满时麦巴比都只系25岁。

英国《BBC》爆料，PSG为留住麦巴比多两年，续约条件上不断加码，包括金额不断提升，再畀埋队长佢做，依家会方再度提高金额，签字费由1.5亿欧元提升到1.8亿欧元，年薪为税後2500万欧元，为期两年，希望佢至少过埋卡塔尔世界盃，以及两年後嘅巴黎奥运。

如果麦巴比肯留低，除咗佢本人保证有丰厚收入，佢嘅团队亦会得到4200万镑嘅天价佣金。

之前有消息指，皇马向麦巴比开出5年合约总值20亿港元，依家麦巴比只要喺巴黎留多两年，就可得到相若金额，可以话相当吸引。

PSG仲有一项绝招，就系畀麦巴比拥有100%全部肖像权，呢个条件可谓PSG独有，因为一般球会都会同球员对分肖像权，各占50%，而皇马就一直唔就肖像权向麦巴比让步，呢一点亦系麦巴比考虑因素之一。