曼城落实将於7月1日签入多蒙特射手艾宁夏兰特之後，各界对於呢位21岁挪威国脚下季表现充满期望，英国传媒爆料，指曼城主帅哥迪奥拿曾经告知夏兰特，「蓝月亮」有多位助攻高手，可以提供源源不绝嘅入波机会，佢入「城」之後，一季起码可以入到30球。

哥迪奥拿之所以咁有信心，因为曼城今季各项赛事，已经有4位球员取得10次以上助攻，成为欧洲5大联赛同一队最多球员助攻达双位数，包括奇云迪布尼有13次，加比尔捷西斯12次，菲尔科顿11次，祖奥简斯路10次，仲未计马列斯、史达宁分别有9次、7次助攻。

英超官方都话艾宁夏兰特加盟曼城，将有大把入波机会，因为多位队友都擅长「铺桥搭路」，其中奇云迪布尼今季英超创造77次机会，包括7次助攻，贝拿度施华创造54次机会，包括3次助攻。

历年来一季英超入30球或以上嘅球员并唔多，对上1次系2017/18年球季，穆罕默德沙拿入32球及哈利卡尼入30球。

艾宁夏兰特上季德甲上阵28场入27球，今季上阵23场入21球，入球率非常高，只要冇伤病，下季英超入30球并唔出奇。