继曼联飞抵泰国後，利物浦周日(10日)亦都抵达曼谷，准备周二(12日)嘅「双红会」大战。利物浦领队高普赛前表示，利物浦对曼联从来冇「友谊赛」，直指今仗系季前备战嘅重要赛事，亦会尽量安排所有球员上阵。

利物浦抵达泰国後，高普、佐敦轩达臣同占士米拿喺机场进行记者会，高普表示：「多谢大家热情招待，今次系我第一次嚟泰国，我哋好期待喺度比赛，亦有时间喺呢个城市观光，希望可以同泰国球迷建立更深关系。」

对於「双红会」大战，高普就话曼联有优势：「曼联有新领队，而且早过我哋少少开操，佢哋状态可能会更好，我哋视对曼联为一次重要考验，绝对唔系友谊赛咁简单！」高普表示阵中部份国脚只系啱啱归队，会畀机会佢哋上阵，但时间唔会太长。