连夺3季希腊联赛冠军嘅奥林比亚高斯，为巩固霸业，今夏继续增兵，最新睇中曼联翼锋柏利斯迪利，希望借用呢位20岁乌拉圭国脚，由於有意甲及葡超球会想签入柏利斯迪利，令到呢位小将突然成为抢手货。

柏利斯迪利2年前由彭拿路加盟曼联之後，大部份时间被外借去西班牙球队艾拉维斯，佢有份参加红魔鬼今夏亚洲之旅热身赛，并喺对利物浦一役，射入1球。

不过，英国《太阳报》指柏利斯迪利并唔适合曼联新帅坦哈格嘅战术体系，所以打算继续将佢外借去，引起唔少球会注意。

除咗奥林比亚高斯之外，仲有几支意甲及葡超球队希望借用柏利斯迪利，曼联倾向将佢外借去奥林比亚高斯，认为佢去希腊搵食，应该可以获得更多上阵机会，达到磨练及吸收比赛经验嘅目的。

一旦奥林比亚高斯打入欧联分组赛，更加有助柏利斯迪利透过踢大赛，加快成长。