乌拉圭国脚卡云尼今夏约满离开曼联之後,仍然未有班落,阿根廷球队小保加曾经力邀呢位35岁前锋加盟,但佢已经拒绝,因为卡云尼仍然希望留喺欧洲搵食,好大机会加盟西甲球队维拉利尔。
据悉卡云尼收到小保加斟介之後48小时,就决定拒绝对方邀请,因为佢首选仍然系效力欧洲球队,佢同家人都希望去西班牙生活,更有传卡云尼已经同维拉利尔达成加盟协议。
事实上,乌拉圭2位殿堂级射手科兰、苏亚雷斯都曾经喺西甲搵食多年,并取得成功,卡云尼来到球员生涯尾声,都希望学呢2位同胞,一尝踢西甲滋味。