新一季西甲将於周六(13日)凌晨开锣，除咗巴塞隆拿之外，另一支西甲劲旅马德里体育会都受到球员注册问题困扰，以借用身份为球队效力嘅前锋基沙文，仍未完成注册工作，未知能否赶及下周二(16日)凌晨西甲作客基达菲。

基沙文上年夏天被巴塞隆拿外借去马体会，今夏再延长借用期多1季，由於呢位31岁前锋人工非常高，马体会今夏经过一轮转会操作後，薪酬已超出西甲上限，身为「打工皇帝」嘅基沙文成为马体会阵中唯一仍未完成注册嘅球员。

不过，马体会同西甲方面都表示，有信心解决基沙文嘅注册问题，预料佢可能会接受减人工，或者马体会出售部份球员。

至於基沙文能否赶及首轮西甲出战基达菲，就成为疑问。基沙文上季为马体会射入8球及7次助攻，若然佢缺阵，势必削弱球队攻力。