皇家马德里勇夺欧超盃，教练安察洛堤继续改写历史，今次系佢历来第4次赢得欧超盃，超越哥迪奥拿嘅3次冠军纪录。「肥安」上季已经成为首个赢晒5大联赛(英超、西甲、德甲、意甲、法甲)冠军教头，亦系第1个4夺欧联冠军主帅，认真犀利！

安察洛堤之前已经带领AC米兰赢过2次欧超盃，2014年亦率领皇马赢过1次，今届第4次捧盃成功超越哥迪奥拿，要知道费格逊、施丹、沙基、尹戈尔、施蒙尼等名帅都只系拎过2次，就知道4夺欧超盃难度有几大。

63岁嘅安察洛堤堪称系人生赢家，佢由球员时代到执起教鞭，已经累积赢过38个大赛冠军，包括球员时代14次冠军同教练生涯24个冠军。今场欧超盃当选MVP嘅卡斯米路赛後表示：「安察洛堤系足球传奇，我衷心尊敬佢，佢已经63岁，但对冠军嘅渴望同细路仔冇分别，呢个系皇马嘅福气。」