般尼茅夫官方周二(30日)宣布，辞退领队柏加。这位少帅成为今季英超首位被炒领队，快过被炒热门夏辛侯迪、林柏特、罗渣士等人，柏加被炒导火线当然系上仗狂吞利物浦9蛋，嚟紧周四凌晨英超快车对狼队，般茅将会由加利奥尼尔暂时领军。

柏加挂靴後喺富咸展开执教生涯，前季富咸降班後被炒，随即转投英冠般尼茅夫，上季协助球队重返英超，今季开锣首仗2比0击败阿士东维拉打响头炮，不过之後遇上艰难赛程，连续对曼城、阿仙奴及利物浦，3连败属意料中事，不过3仗失16球实在太多，终被落镬。

不过柏加事前似乎闻到鱿鱼香，喺0比9惨败於利物浦之後，佢喺记者会无奈表示会方喺升班後并无增兵，可能因此触怒高层，佢当时好坦白话：「我班球员需要帮助，佢哋只能同空气搏斗，我哋有几百万个理由唔去增兵，好多嘢都系环境造成，我哋搵唔到人，或者啲球员唔想嚟。」

计埋柏加，佢系高普执教利物浦後第6位输畀红军後被炒主帅，之前5人分别系史云斯古度连、韦斯咸比历、富咸祖简奴域、曼联摩连奴、爱华顿马高施华，高普可以话系领队杀手。