利物浦今季表现令人失望，上仗作客打和爱华顿0比0，今季英超3场作客都赢唔到，成为球队近12年最差开季作客成绩，加上6场联赛得9分，亦系高普执教红军以来同期最差开季成绩。

呢位德国名帅执教缅恩斯、多蒙特，都系大约教7年就离开，高普担任利物浦领队已近7年，令到「7年之痒魔咒」警号再次响起。

高普2001年2月展开教波生涯，临危受命成为当时德乙球队缅恩斯主帅，协助球队护级成功，2004年更加率领球队首次升上德甲，打出名堂。

不过，仅过3年缅恩斯就降班，虽然高普选择留任，但1年後都系离队，转投多蒙特，佢执教缅恩斯时间大约7年零4个月。

高普担任多蒙特教练，同样经历重建、创高峰，但衰收尾，佢2008年夏天开始执教「蜜蜂兵团」，领军连夺2010/11年、2011/12年球季德甲冠军，并打入2013年欧联决赛，但之後2季成绩走下坡，2015年4月提早宣布季尾离队，该季多蒙特最後只排德甲第7位，换言之高普做咗多蒙特教练刚好7年。

高普2015年10月成为利物浦领队，逐步带队球队由「海鲜波」变顶级劲旅，捧欧联及英超冠军，但今季明显走下坡，刚好高普嘅红军生涯将满7年，似乎避唔过「7年之痒魔咒」。