周六(3日)德甲赛事，拜仁慕尼黑作客只能够1比1逼和柏林联，连续第2场联赛失分，依家跌到联赛榜第3位，榜首位置就意外落喺弗赖堡身上，拜仁教练拿高斯文赛後表示唔会理会依家排名，强调要喺周中欧联重振雄风。

拜仁今场强阵出击，一开波就施展狂攻，但12分钟反而畀柏林联前锋碧加射入，拜仁3分钟後即由甘美治追平，原本以为可以乘胜追击，但全场20次攻门都拎唔到第2个入波，最终连续第2场和波失分。弗赖堡同日凭堂安律尾段攻入致胜球，作客3比2赢利华古逊5战得12分，以较佳得失球压住多蒙特排榜首。

拜仁教练拿高斯文赛後表示：「我哋有4次黄金机会，上轮对慕逊加柏有31次射门，我唔觉得球队缺乏创造力，只系效率出现问题，我哋要喺周中欧联对国际米兰重新搵到能量。」对於拜仁跌落第3位，拿高斯文就话：「我哋嘅目标系冠军，依家只系第5轮，我先唔X在乎依家排第3位！」